ජීව අත්බෝම්බයක් සහ හෙරොයින් තොගයක් සමඟ පාතාල සාමාජිකයෙක් අත්අඩංගුවට ගෙන තිබෙනවා. ඒ පනාගොඩ යුද හමුදා කඳවුර ආසන්නයේදී මෝටර් රථයකින් ගමන් කරමින් සිටියදීයි.
පොලිස් විශේෂ කාර්ය බළකායට ලැබුණු තොරතුරක් අනූවයි සැකකරු අත්අඩංගුවට ගෙන තිබෙන්නේ. ඝාතන සිදුවීම්වලට ද සැකකරු සම්බන්ධ බවයි පොලිසිය පවසන්නේ.
ඉන්දුනීසියාව දැවැන්ත විවාහ මංගලෝත්සවයක් පැවැත්වූවා. ඒ නව අවුරුදු උදාවට සමගාමීවයි.යුවළ 500ක් ජකර්තා නගරයේදී විවාහ දිවියට ඇතුළත් වූ බවයි ජාත්‍යන්තර මාධ්‍ය සඳහන් කළේ.
දිළිදු පවුල්වල තරුණ තරුණියන් විවාහ කරදීම සඳහා ඉන්දුනීසියා රජය මෙම වැඩපිළිවෙල සංවිධාන කර තිබෙනවා. නව අවුරුදු උදාව සැමරිමට ද ඔවුන් එක්වුණා.
ආපන ශාලාවල දුම්පානය තහනම් කරන බව මැලේසියාව ප්රකාශ කළා.
ජනතාවගේ සෞඛ්‍ය තත්ත්වය ආරක්ෂා කිරිමයි මෙහි අරමුණවී තිබෙන්නේ. ඒ සඳහා නව පනතක්ද හදුන්වා දී තිබෙනවා. එය කඩකරන පුද්ගලයන්ට එරෙහිව පනවන දඩ මුදල ඇමරිකා ඩොලර් 2450ක්. වසර දෙකක සිර දඩුවම් කාලයක් ද නියම කළ හැකියි. නීති ප්රතිපාදන හදුන්වා දුන් බවයි මැලේසියාව පවසන්නේ.
අනුරාධපුර අභය භූමිය තුළ අවිධිමත් ලෙස කැළිකසළ බැහැර කිරීම හේතුවෙන් ගැටලු රැසක් පැන නැගී ඇති බව වාර්තා වනවා.
දිනපතා අනුරාධපුර නගරයට සංචාරකයින් සිය ගණනක් පැමිණෙනවා. අනුරාධපුර පූජා නගරය අවට පදිංචිකරුවන් ප්‍රධාන මාර්ග අසළ මෙන්ම තම නිවෙස් ඉදිරිපිට අවිධිමත් ලෙස කැළිකසළ බැහැර කිරීම නිසා සුන්දර නගරය අසුන්දර බවට පත්ව ඇති අයුරු දැකගත හැකියි. පූජා භූමිය තුළ අවිධිමත් ලෙස කසළ බැහැර නොකරන ලෙස දැන්වීම් පුවරු ද ප්‍රදර්ශනය කර තිබෙනවා. එහෙත් දැකගත හැකි වන්නේ එම පුවරු අසලද කසළ බැහැර කර ඇති අයුරුයි. මේ හේතුවෙන් දෙස් විදෙස් සංචාරකයන් දැඩි අපහසුතාවට පත්ව සිටිනවා. මේ පිළිබද සියලු දෙනාගේ අවධානය යොමු විය යුතු බවයි සංචාරකයන් පවසන්නේ.
යේමන් ගැටුම් හේතුවෙන් සිවිල් වැසියන් දැඩි පීඩාවට පත්වුණා. ඔවුන්ට ආහාර ලබාදීමේ වැඩසටහනට ද ගැටළු මතුව තිබෙනවා.
ඇතැම් ප්රදේශවලට ප‍්‍රවේශ වීමට නොහැකි වීමයි ඊට හේතුවවී තිබෙන්නේ. සහන සැළසීම සඳහා අවශ්‍ය පහසුකම් සළසන ලෙසට ලෝක ආහාර වැඩසටහන ගැටුම්වලට සම්බන්ධ පාර්ශව වලින් ඉල්ලීමක් කළා. මිලියන 20කට පමණ බලපෑම් එල්ල වී ඇති බවයි ඔවුන් පවසන්නේ.
රජරට ප්රදේශ රැසක ගොවිබිම්වලට මොණරුන්ගෙන් හානි පැමිණෙන බව වාර්තා වනවා.
විලච්චිය, හොරොව්පොතාන, ගලෙන්බිදුනුවැව, නොච්චියාගම,තන්තිරිමලය යන ප්රදේශවල බොහෝ දෙනෙකුගේ ජීවනෝපාය ගොවිතැනයි. ඉතා අසීරුවෙන් වගා කරන ගොවිබිම් එක රැයකින් මොණරුන් විනාශ කරන බව ගොවීන් පවසනවා. වී, කව්පි, සෝයා, මිරිස්, තක්කාලි වැනි වගාවන්ට මොණරුන්ගෙන් දැඩි බලපෑමක් එල්ල වී තිබෙනවා. මොණරුන්ගෙන් ගොවිබිම් ආරක්ෂා කර ගැනීමට විධිමත් ක්‍රමවේදයක් සකසා දෙන ලෙස එම ගොවීන් බලධාරීන්ගෙන් ඉල්ලා සිටිනවා.
දකුණුදිග පිලිපීනයේ ජනාකීර්ණ වෙළඳ සංකීර්ණයක සිදු වූ පිපිරීමකින් පුද්ගලයින් දෙදෙනෙකු ජිවිතක්ෂයට පත් වුණා.
දකුණුදිග පිලිපීනයේ කොටාබටෝ නගරයේ වෙළඳ සංකීර්ණයකයි පිපිරීම සිදු වුණේ. ඉන් පුද්ගලයින් 34 දෙනෙකු තුවාල ලබා තිබෙනවා. ඒ අතරින් තුන්දෙනෙකුගේ තත්ත්වය බරපතල බවයි වාර්තා වන්නේ. එම වෙළඳ සංකීර්ණයේ තිබූ බව කියන පුපුරන ද්‍රව්‍ය ඉවත් කරමින් සිටි අතරතුර මෙම පිපිරීම සිදුව ඇති බව සඳහන්. නගරයේ ආරක්ෂාවද මේ වන විට තර කර තිබෙනවා.
2019 නව වසරේ උදාව ලෝකය පුරා ජනතාව මහත් උත්කර්ෂවත්ව සැමරුවා.
නව වසර පැසිෆික් සාගරයේ කිරිබති දිවයිනෙන් ආරම්භ වුණා. ලොව පුරා නන් දෙසින් පැමිණි සංචාරකයින් නව වසරේ උදාව සැමරීම සදහා එම දිවයිනට එක්ව සිටි බව සදහන්. කිරිබති දිවයිනට පසුව සැමෝවා දිවයිනට නව වසර උදා වුණා. ඉන් අනතුරුවයි නවසීලන්තයට 2019 වසර උදා වුණේ. ගිනිකෙළි සංදර්ශන නැරඹීම සදහා විශාල පිරිසක් එක්ව සිටි බව සදහන්.
දිවයිනේ බොහෝ ප්රදේශවලට වැසි රහිත කාලගුණ තත්ත්වයක් අපේක්ෂා කළ හැකි බව කාලගුණ විද්‍යා දෙපාර්තමේන්තුව නිවේදනය කරනවා.
2019 වසර දූෂණ සහ වංචාවලින් තොරව වැඩකරන වර්ෂයක් බවට පත්කර ගැනීමට සියලු දෙනා එක්ව කටයුතු කළ යුතු බව ජනාධිපති මෛත්‍රීපාල සිරිසේන මැතිතුමා පවසනවා. දළදා සමිදුන් වැදපුදා ගැනීමෙන් පසු මාධ්‍ය වෙත අදහස් දක්වමිනුයි ජනාධිපතිතුමා මේ බව කියා සිටියේ.
මහනුවර ශ්රී දළදා මාලිගාව වෙත පැමිණි ජනාධිපති මෛත්‍රීපාල සිරිසේන මැතිතුමා දළදා වහන්සේ වැදපුදාගෙන ආගමික වතාවත්වල නිරතවුණා. අනතුරුව ජනාධිපතිතුමා මල්වතු පාර්ශ්වයේ මහනායක අතිපූජ්‍ය තිබ්බටුවාවේ ශ්රී සුමංගල ස්වාමීන් වහන්සේ බැහැදැක සුවදුක් විමසා පිළිසදරක නිරත වුණා. උන්වහන්සේ එහිදී සෙත් පිරිත් සඡ්ඣායනා කරමින් ජනාධිපතිතුමා වෙත උදාවන නව වසර වෙනුවෙන් ආශිර්වාද පළකලා. අස්ගිරි මහනාහිමියන් විදෙස් ගතව වැඩසිටින බැවින් අස්ගිරි ගෙඩිගේ රජමහා විහාරය වෙත ගිය ජනාධිපතිතුමා අස්ගිරි අනුනායක පූජ්‍ය වෙඩරුවේ උපාලි නාහිමියන් බැහැදැක කෙටි පිළිසදරක නිරතවුණා. උන්වහන්සේ ද සෙත් පිරිත් සඡ්ඣායනා කොට උදාවන නව වසර වෙනුවෙන් ආශිර්වාද පළකලා. අස්ගිරි ගෙඩිගේ විහාරස්ථානයේ අභිනවයෙන් ඉදිකෙරෙන නව දානශාලාවේ සහ පුරාවිද්‍යා මධ්‍යස්ථානයේ ඉදිකිරීම් කටයුතු ද ජනාධිපතිතුමාගේ නිරික්ෂණයට ලක්වුණා.
මහනුවර මහ රෝහලේ ප්‍රතිකාර ලබන රාමඤ්ඤ මහා නිකායේ මහ නායක පූජ්‍ය නාපාන පේමසිරි නායක ස්වාමීන් වහන්සේගේ සුවදුක් විමසීමට ද ජනාධිපතිතුමා කටයුතු කළා. මධ්‍යම පළාත් ප්‍රධාන අමාත්‍ය සරත් ඒකනායක, හිටපු අමාත්‍ය එස් බී දිසානායක යන මහත්වරුන්ද ජනාධිපතිතුමා සමග මෙම අවස්ථාවට එක්ව සිටියා.
පුද්ගලයන් ලියාපදිංචි කිරීමේ දෙපාර්තමේන්තුව විසින් 2019 ජනවාරි 01 දා සිට මුළු දිවයිනටම සුහුරු ජාතික හැඳුනුම්පත් (Smart National Identity Card) නිකුත් කිරීමට පියවරගෙන ඇතැයි එම දෙපාර්තමේන්තුවේ කොමසාරිස් ජනරාල් වියානි ගුණතිලක මහතා පවසයි.
මෙම සුහුරු හැඳුනුම්පත් අත්හදා බැලීමේ පදනම මත දෙසැම්බර් 17 දා සිට බස්නාහිර සහ සබරගමුව පළාත් වල පමණක් නිකුත් කිරීම අරඹනු ලැබීය. එය සාර්ථක වූ බැවින් ජනවාරි 1 දා සිට මුළු දිවයිනේම මෙම වැඩපිළිවෙල ක්රියාත්මක කිරීමට තීරණය කළ බව ගුණතිලක මහතා වැඩිදුරටත් ප්රකාශ කළේය.
මෙම නව ක්රමය යටතේ ජාතික හැඳුනුම්පත් සඳහා අයදුම් කිරීමේදී , අයදුම්පතේ අයදුම්කරුගේ ඡායාරූපය ඇලවීම අවශ්‍ය නොවේ. මේ සඳහා පුද්ගලයින් ලියාපදිංචි කිරීමේ දෙපාර්තමේන්තුව යටතේ ලියාපදිංචි වී ඇති ඡායාරූප හල් වලින් පමණක් ඡායාරූප ගත යුතුය.එහිදී ගනු ලබන ඡායාරූප අයදුම්කරුට නොලැබෙන අතර ඡායාරූප ශාලා විසින් එය online (විද්‍යුත් තැපෑල) මගින් දෙපාර්තමේන්තුවට යවනු ලැබේ. ඡායාරූපයේ මුද්‍රිත පිටපතක් ඡායාරූප ශාලාව විසින් ලබාදෙන රිසිට් පතේ අලවනු ලබන අතර එම රිසිට් පත අයදුම්කරු විසින් තම ඉල්ලුම් පත්‍රය සමඟ ප්රදේශයේ ග්‍රාම නිලධාරීවෙත බාරදිය යුතුය.
සුහුරු ජාතික හැඳුනුම්පත් වලට ඡායාරූප ගැනීම සඳහා දෙපාර්තමේන්තුව විසින් දිවයින පුරා පිහිටි ඡායාරූප ශාලා 2100ක් දැනට ලියාපදිංචි කොට තිබේ. ඔවුන්ට ඒවා දෙපාර්තමේන්තුව වෙත යැවීම සඳහා ජාත්‍යන්තර සිවිල් ගුවන් සේවා සංවිධානයේ නිර්නායකයන්ට අනුව සැකසූ විශේෂ මෘදුකාංගයක් ලබා දී ඇති බව ගුණතිලක මහතා කීය.
මෙම නව ක්රමය මගින් ජාතික හැඳුනුම්පත් සඳහා විකෘති කළ හෝ වැරදි ඡායාරූප ඇතුළත් කිරීම වැනි අයථා ක්‍රියා නතරවෙනු ඇති බවද කොමසාරිස් ජනරාල්වරයා තවදුරටත් සඳහන් කළේය.
ගංවතුරෙන් පීඩාවට පත් කිළිනොච්චිය සහ මුලතිව් දිස්ත්‍රික්වල ජනතාවගේ නිවාස ගැටළු විසදීමේ වැඩපිළිවෙල ලබන 12 වනදා ආරම්භ කරන බව අමාත්‍ය සජිත් ප්‍රේමදාස මහතා පවසනවා.
උතුරු පළාතට බලපෑ ගංවතුරෙන් පීඩාවට පත් කිලිනොච්චිය හා මුලතිව් දිස්ත්‍රික් ජනතාවට සහන ලබාදීමේ තවත් වැඩපිළිවෙලක් අමාත්‍යවරයාගේ ප්‍රධානත්වයෙන් පැවැත්වුණා. කිලිනොච්චිය පන්නක්කණ්ඩි පාසලේ සහ පුදුකුඩුඉරිප්පු මන්ඩකන්ඩාල් ප්රදේශවල අවතැන් කදවුරුවල සිටින ජනතාවගේ සුවදුක් සොයා බැලීමට අමාත්‍යවරයා පියවර ගත්තා. එම ජනතාවට සහන ලබාදීමේදී හමුදා අංශ සිදු කරන මෙහෙයද අමාත්‍යවරයාගේ ඇගයීමට ලක් වුණා.
පසුගිය සති කිහිපයේ පැවති දේශපාලන අර්බුදය නිමවීමෙන් පසු යුරෝපා ආයෝජකයන් මෙරටට ගෙන්වා ගැනීමට හැකිවී තිබෙන බව බ්‍රිතාන්‍ය ශ්‍රි ලංකා වාණිජ මණ්ඩලයේ සභාපති ජයම්පති පෙරේරා මහතා පවසනවා.
ශ්රී ලංකාව තුළ ප්‍රජාතන්ත්‍රවාදය සහ නීතිය ස්ථාපිත වීම නිසා යුරෝපා ආයෝජකයන් පැමිණීම සදහා විශේෂ කැමැත්තක් දක්වන බවයි ජයම්පති පෙරේරා මහතා පෙන්වා දෙන්නේ. කොළඹ පැවති මාධ්‍ය හමුවකට එක්වෙමින් ඔහු මේ බව කියා සිටියා.
ජයම්පති පෙරේරා – සභාපති – බ්‍රිතාන්‍ය ශ්‍රි ලංකා වාණිජ මණ්ඩලය
කොළඹ වරාය බහාලුම් ඒකක මිලියන 07 ක් මෙහෙයවීම සනිටුහන් කිරීමේ උත්සවය ජය බහාලු පර්යන්තයේදී අද පැවැත්වුණා. වරාය නාවික හා දක්ෂිණ සංවර්ධන අමාත්‍ය සාගල රත්නායක මහතාගේ ප්‍රධානත්වයෙන්.
2018 වසරේදී කොළඹ වරාය ලොව හොදම බහාලු මෙහෙයුම් වරාය 30 අතර පළමු ස්ථානයට පත් වුණා. සමුද්‍රීය වෙළද ව්‍යාපාර තුළ අංක 1 ස්ථානයේ ශ්‍රේණිගත වීමටද කොළඹ වරායට හැකි වී තිබෙනවා. මෙම ජයග්‍රහණය ලබා ඇත්තේ යුරෝපා සහ මැදපෙරදිග වරාය රැසක් අභිවමින්. අන්තර් පර්යන්ත මෙහෙයුම් අවබෝධතා ගිවිසුමක් මේ වන විට අත්සන් තබා ඇති අතර එමගින් වරායේ කටයුතු තවත් ප්‍රවර්ධනය කෙරෙනවා.
අමාත්‍ය සාගල රත්නායක,
මෙම අවස්ථාවට අවස්ථාවට වරාය නාවික හා දක්ෂිණ සංවර්ධන අමාත්‍යාංශයේ ලේකම් ආචාර්ය පරාක්‍රම දිසානායක මහතාද එක් වුණා.
මුලතිව් හා කිළිනොච්චි දිස්ත්‍රික්වලට බලපෑ ගංවතුර තත්ත්වයෙන් හානියට පත් කුඹුරු සදහා වන්දි ලබා දීමට කෘෂිකර්ම අමාත්‍යාංශය තීරණය කර තිබෙනවා.
මුලතිව් හා කිළිනොච්චි දිස්ත්‍රික්වල වගා හානි සිදුවූ කුඹුරු පිළිබද තොරතුරු ලබා ගන්නා ලෙස සහ ගොවීන්ට රක්ෂණ වන්දි ලබා දීමට පියවර ගන්නා ලෙස අමාත්‍ය පී හැරිසන් මහතා උපදෙස් ලබා දී තිබෙනවා. ගොවි ජන රක්ෂණය මගින් වගා හානියකදී වන්දි මුදල් ලබා දෙන ක්‍රම වේදය අනුව ගං වතුරක දී වී වගාවට හානියක් සිදුව ඇත්නම් අක්කරයකට රුපියල් හතලිස් දහස බැගින් හෙක්ටයාර එකකට රුපියල් ලක්ෂයක මුදලක් වන්දි වශයෙන් ලබාදීම සිදුවනවා. මේ අතර මුලතිව් හා කිලිනොච්චි දිස්ත්‍රික්කවල වගාහානි වලට මුහුණ පෑ ගොවීන්ට බිත්තර වී මිලදී ගැනීම සදහා 50%ක සහනාධාරයක් සහ පොහොර සහනාධාරයක් ද ලබා දීමට කෘෂිකර්ම අමාත්‍යාංශය තීරණය කර තිබෙනවා.
ශ්රී ලංකා නිදහස් පක්ෂ ආසන සංවිධායකවරුන් 25 දෙනෙකු එක්සත් ජාතික පෙරමුණට එක්වීමට කැමැත්ත පළකර ඇති බව අමාත්‍ය රාජිත සේනාරත්න මහතා පවසනවා. පයාගල ප්රදේශයේ පැවති ජන හමුවකදීයි අමාත්‍යවරයා මේ බව සදහන් කළේ.
අමාත්‍ය රාජිත සේනාරත්න,
පයාගල හිරිගල් ගොඩැල්ල, කජුදූව මාර්ගය සහ පයාගල, ගල්ලනමුල්ල,පොල්වත්ත මාර්ගය සංවර්ධනය කිරීමෙන් පසු විවෘත කිරීම අමාත්‍ය රාජිත සේනාරත්න මහතාගේ මූලිකත්වයෙන් සිදු කෙරුණා. මේ සදහා වැය කෙරුණු මුදල රුපියල් මිලියන දාහතරයි දශම පහක් පමණ වනවා. ගිහි පැවිදි විශාල පිරිසක් මෙම අවස්ථාවට එක්ව සිටියා.
මාවනැල්ල ප්රදේශයේ ඇති වූ සිද්ධියේ දී සාමය ආරක්ෂා කිරීම සඳහා මහා සංඝරත්නයෙන් සිදු වූ මෙහෙය විශිෂ්ට බව අමාත්‍ය කබීර් හෂීම් මහතා පවසනවා.
මාවනැල්ල ප්රදේශයේ බුදුපිළිමවලට සිදු වූ හානිය පිලිබඳ සොයා බැලීම සඳහා ප්රදේශයේ සංචාරයක නිරත වෙමින් මහාසංඝරත්නය හමුවූ අවස්ථාවේදී අමාත්‍යවරයා මේ බව කියා සිටියා. සිදුවූ සියලු හානි යථා තත්ත්වයට පත් කිරීම සඳහා රජය මැදිහත් වී කටයුතු කරන බවද අමාත්‍යවරයා මහා සංඝරත්නය හමුවේ සඳහන් කළා.
හැටන් පොඩයිස් වතුයායේ ගින්නෙන් විනාශ වූ වතු නිවාස වෙනුවට නව නිවාස ඉදිකර දීමට පියවර ගන්නා බව කදුරට ජනතා පෙරමුණේ නායක පාර්ලිමේන්තු මන්ත්‍රි වී රාධා ක්‍රිෂ්ණන් මහතා පවසනවා. වතු කම්කරුවන්ගේ වටිනා ලියකියවිලි ජංගම සේවයක් පවත්වමින් ඔවුන්ට ලබා දීමට පියවර ගන්නා බවද මන්ත්‍රිවරයා සදහන් කළා.
පොඩයිස් වතුයායේ අක්කර තිහ කොටසේ වතු නිවාස විසිහතරක් ගින්නෙන් විනාශ වූයේ පෙරේදා දිනයේදීයි. එම ප්රදේශයේ කළ සංචාරයකින් අනතුරුවයි මන්ත්‍රිවරයා මේ බව සදහන් කළේ. මෙම ගින්නෙන් පවුල් 19කට අයත් 107 දෙනෙකු අවතැන්ව සිටිනවා. ඔවුන් එම වතුයායේ වෛද්‍ය මධ්‍යස්ථානය තුළ රදවා සිටිනවා. ඒ අතර ළමයින් 45 දෙනෙකු ද වනවා. ඔවුන්ට පාසල් උපකරණ ලබා දීම ද මන්ත්‍රිවරයා අතින් සිදු කෙරුණා. මෙම පිරිසට අවශ්‍ය ආහාර ලබා දීමට වතු පාලන අධිකාරිය පියවර ගෙන තිබෙනවා.
ලබන වසර තුළ ජර්මනිය ලෝකයේ වගකීම් රැසක් දරණ රටක් බවට පත්වන බව ජර්මන් චාන්සලර් ඇන්ගලා මර්කල් ප්රකාශ කළා.
ද්විපාර්ශවික සම්බන්ධතා තහවුරු කරගැනීමත් අරමුණක්. ජගත් ආරක්ෂක මණ්ඩලය තුළ ද කි‍්‍රයාකාරී වැඩ කොටසක් ඉටුකිරීමට අපේක්ෂා කරන බවයි ජර්මන් චාන්සලර්වරිය පවසන්නේ. සංක‍්‍රමණික අර්බුද සම්බන්ධයෙන් ද ඔවුන්ගේ විශේෂ අවධානය යොමුව තිබෙනවා.
.
සිරියාවේ සිටින අයි එස් සටන්කාමීන් සම්පූර්ණයෙන්ම පරාජයට පත්කිරීමට තමා කැපවන බව ඇමෙරිකානු ජනාධිපති ඩොනල්ඩ් ට්‍රම්ප් පවසා තිබෙනවා.
ඇමෙරිකා ජනාධිපතිවරයා මේ බව ප්රකාශ කළ බව ජ්‍යෙෂ්ට රිපබ්ලිකන් පක්ෂ සාමාජිකයෙකු වන ලින්සේ ග්‍රැහැම් පවසා තිබෙනවා. සිරියාවේ සිටින අයිඑස් සංවිධානය පරාජයට පත්කර ඇති බවට පවසමින් ඇමෙරිකානු භටයින් සිරියාවෙන් ඉවත් කර ගන්නා බව ඩොනල්ඩ් ට්‍රම්ප් මීට පෙර නිවේදනය කර තිබුණා. ඇමෙරිකා ජනාධිපතිවරයාගේ එම තීරණයට රිපබ්ලිකන් පක්ෂයේ සාමාජිකයන් ඇතුළු පාර්ශ්ව ගණනාවකින් විරෝධය පළවුණා. ආණ්ඩු පක්ෂයේ නිළධාරීන් දෙදෙනෙකු ද අදාළ තීරණයට එරෙහිව ඉල්ලා අස්වුණා. කෙසේ වෙතත් සිරියාවේ සිටින අයිඑස් සටන්කාමීන් පූර්ණ වශයෙන් පරාජයට පත්වන තුරු ඇමෙරිකා සොල්දාදුවන් ඉවත්කර නොගන්නා බව ලින්සේ ග්‍රැහැම් වැඩිදුරටත් පවසා තිබෙනවා.
ජල ගැලීම්වලට ලක් වූ උතුරේ ප්රදේශ කේන්ද්‍ර කරගනිමින් විශේෂ ඩෙංගු මර්දන වැඩසටහනක් ආරම්භ කර තිබෙනවා.
අයහපත් කාලගුණය හේතුවෙන් උතුරේ ප්රදේශ රැසක් ජලයෙන් යටවුණා. එම ප්රදේශ කේන්ද්‍ර කරගනිමින් සෞඛ්‍ය අමාත්‍යාංශයේ මැදිහත් වීමෙන් මෙම විශේෂ ඩෙංගු මර්දන වැඩසටහන ක්‍රියාත්මකයි. මහජන සෞඛ්‍ය පරීක්ෂකවරුන් ඇතුළු නිලධාරීන් රැසක් ඊට එක්ව සිටිනවා. නිවාස සහ ළිං පිරිසිදු කිරීමේ කටයුතු සදහා හමුදා කණ්ඩායම් ද දායකත්වය ලබාදී තිබෙනවා.
පුත්තලම නගර සභාවේ නඩත්තු අංශයේ ගබඩාවේ ඇතිවූ ගින්නකින් එය මුළුමනින්ම විනාශ වී තිබෙනවා.
පෙරවරු 10.00 ට පමණ මෙම ගින්න හටගත් බවයි නගර සභා සේවකයින් පවසන්නේ. මෙම ගබඩාවේ ඉන්ධන සහ තවත් ද්‍රව්‍ය ගබඩා කර තිබුණා. ගින්නෙන් ඒ සියල්ලම විනාශ වී තිබෙනවා. නගර සභා සේවකයින්, පුත්තලම පොලිසියේ නිලධාරීන් පුත්තලම තම්බපන්නි නාවික හමුදා ගිනි නිවන අංශයේ , පොලිස් විශේෂ කාර්ය බලකායේ සහ යුද හමුදාවේ නිලධාරීන් එක්ව ගින්න නිවා දමා තිබෙනවා. පුත්තලම නගර සභා මාසික රැස්වීම ද අද දිනයේ පැවැත්වුණා. එහි සිටි නාගරික මන්ත්‍රිවරුන්ද ගින්න නිවා දැමීමට එක්ව සිටියා. විදුලි කාන්දුවකින් මෙම ගින්න හටගන්නට ඇති බවට විශ්වාස කරන බවයි පුත්තලම නගරාධිපති කේ ඒ බායිස් මහතා සදහන් කරන්නේ.
අයහපත් කාලගුණයෙන් පීඩාවට පත් උතුරේ ජනතාවට සහන රැගෙන විශේෂ දුම්රියක් හෙට කොළඹ කොටුවෙන් ගමන් ඇරඹීමට නියමිතයි.
පසුගිය දිනවල ඇද හැලුණ ධාරානිපාත වර්ෂාවත් සමග වව්නියාව, කිලිනොච්චිය, මුලතිව් හා යාපනය ප්රදේශවල විශාල පිරිසක් අවතැන් වුණා. ඔවුන්ට දැනට සලසන සහන වැඩපිළිවෙළට සහාය දක්වමිනුයි මෙම විශේෂ දුම්රිය කිලිනොච්චිය බලා ධාවනය කිරීමට කටයුතු යොදා ඇත්තේ. ජනවාරි පළමු වනදා පෙරවරු 6.30ට කොළඹ කොටුවෙන් ගමන් අරඹන එම දුම්රියට අත්‍යවශ්‍ය ආහාර ද්‍රව්‍ය හා සනීපාරක්ෂක ද්‍රව්‍ය ඇතුලු උපකරණ භාර දිය හැකියි. රාගම, ගම්පහ, වේයන්ගොඩ, මීරිගම, පොල්ගහවෙල, කුරුණෑගල, ගනේවත්ත, මහව, ගල්ගමුව හා අනුරාධපුරය යන දුම්රිය ස්ථානවලදී ජනතාවට තම ආධාර මේ සඳහා ලබා දීමට පහසුකම් සලසා තිබෙනවා. ශ්රී ලංකා දුම්රිය දෙපාර්තමේන්තුව හා ජනාධිපති ලේකම් කාර්යාලය එක්ව මෙම වැඩසටහන ක්‍රියාවට නංවා තිබෙනවා.
ඉන්දික රුවන් පතිරණ – කැදවුම්කරු – සුරකිමු දුම්රිය ව්‍යාපාරය,
ප්‍රාදේශීය සංවර්ධනයට පළාත් පාලන ආයතන සදහා ප්රතිපාදන ලබා දෙන්නැයි ශ්රී ලංකා පොදුජන පෙරමුණේ පළාත් පාලන ආයතන නියෝජිතයින් ඉල්ලා සිටිනවා.
ශ්රී ලංකා පොදුජන පෙරමුණේ පළාත් පාලන නියෝජිත සංගමය නෙළුම් මාවත පක්ෂ මූලස්ථානයේ පැවැත්වූ මාධ්‍ය හමුවකදී මේ පිළිබද අදහස් පල කෙරුණා.
ජනාධිපති මෛත්‍රීපාල සිරිසේන මැතිතුමා දළදා සමිදුන් වැදපුදා ගත්තා.
මහනුවර ශ්රී දළදා මාලිගාව වෙත පැමිණි ජනාධිපති මෛත්‍රීපාල සිරිසේන මැතිතුමා දළදා වහන්සේ වැදපුදාගෙන ආගමික වතාවත්වල නිරතවුණා. අනතුරුව ජනාධිපතිතුමා මල්වතු පාර්ශ්වයේ මහනායක අතිපූජ්‍ය තිබ්බටුවාවේ ශ්රී සුමංගල ස්වාමීන් වහන්සේ බැහැදැක ආශිර්වාද ලබා ගත්තා.
උතුරු ප්රදේශයේ පැවති ආපදා තත්ත්වය ක්‍රමයෙන් පහව යමින් පවතින බව ආපදා කළමනාකරණ මධ්‍යස්ථානය පවසනවා. මේ වන විට ප්රදේශ රැසක ජන ජීවිත යථා තත්ත්වයට පත්ව ඇති බවයි එම මධ්‍යස්ථානයේ නියෝජ්‍ය අධ්‍යක්ෂ ප්රදීප් කොඩිප්පිලි මහතා ප්රකාශ කළේ.
ප්රදීප් කොඩිප්පිලි – නියෝජ්‍ය අධ්‍යක්ෂ – ආපදා කළමනාකරණ මධ්‍යස්ථානය,
බීමත් රියදුරන් අත්අඩංගුවට ගැනිමේ මෙහෙයුම් වැඩිකරන බව පොලිසිය ප්රකාශ කළා.
උත්සව සමයේදී බීමත් රියදුරන් හේතුවෙන් සිදුවන අනතුරු වළක්වා ගැනීම මෙහි අරමුණයි. අද දිනයේදීත් රටපුරා මෙහෙයුම් ක්රියාත්මක බවයි පොලිස් මාධ්‍ය ප‍්‍රකාශක පොලිස් අධිකාරි රුවන් ගුණසේකර මහතා ප්රකාශ කළේ.
අධ්‍යයන පොදු සහතික පත්‍ර උසස්පෙළ විභාග ප්‍රතිඵල නැවත සමීක්ෂණය සදහා ලබන 16 වනදා දක්වා ඉල්ලුම් කළ හැකි බව විභාග දෙපාර්තමේන්තුව සදහන් කරනවා.
මෙවර අධ්‍යයන පොදු සහතිකපත්‍ර උසස් පෙළ විභාගය සදහා මෙවර අපේක්ෂකයින් තුන් ලක්ෂ විසි එක්දහස් හාරසිය හැට නව දෙනෙකු පෙනී සිටියා. විභාග ප්‍රතිඵල අනුව එක් ලක්ෂ හැට හත් දහස් නවසිය හත් දෙනෙකු විශ්ව විද්‍යාල ප්‍රවේශය සදහා සුදුසුකම් ලබා තිබෙනවා. මේ අතර විභාග ප්‍රතිඵල නැවත සමීක්ෂණය සදහා ලබන 16 වනදා දක්වා ඉල්ලුම් කළ හැකියි. පාසල් අයදුම්කරුවන් සදහා නැවත සමීක්ෂණ අයදුම්පත් ප්‍රතිඵල ලේඛණ සමග විදුහල්පතිවරුන් වෙත යොමුකර තිබෙනවා. මේ අතර පෞද්ගලික අයදුම්කරුවන්ට ජාතික පුවත්පත්වල හෝ විභාග දෙපාර්තමේන්තු නිල වෙබ් අඩවියේ පල කරන දැන්වීම අනුව අයදුම්පත් යොමු කළ හැකියි.
ගාල්ල නගරයේ සිදුවූ රිය අනතුරකින් අට දෙනෙකු තුවාල ලබා තිබෙනවා.
ගාල්ල මාතර ප්‍රධාන මාර්ගයේදීයි අනතුර සිදුවුණේ. මාතර දෙසින් වැරදි මංතීරුවේ වේගයෙන් පැමිණි ලොරි රථයක් මාතර දෙසට ධාවනයවූ වෑන් රථයක මුහුණට මුහුණ ගැටීමෙන් මෙම අනතුර සිදුවුණා. තුවාල ලැබූවේ වෑන් රථයේ සිටි පිරිසයි. වෑන් රථයේ රියදුරුගේ තත්ත්වය බරපතල බව රෝහල් ආරංචි මාර්ග පවසනවා. තුවාල කරුවන් අතර කුඩා දරුවන් තුන් දෙනෙකු ද වනවා. සිද්ධිය සම්බන්ධයෙන් ලොරි රථ රියදුරු අත්අඩංගුවට ගෙන තිබෙනවා.
මුදල් හා ජනමාධ්‍ය අමාත්‍යාංශයේ නව ලේකම්වරයා ලෙස ආචාර්ය ආර්.එච්.එස්. සමරතුංග මහතා පත් කර තිබෙනවා.
ඒ මහතා අද (31) පෙරවරුවේ ජනාධිපති නිල නිවසේ දී ජනාධිපති මෛතී‍්‍රපාල සිරිසේන මැතිතුමා අතින් සිය පත්වීම් ලිපිය ලබා ගත්තේ ය.
හෂීස් මත්ද්‍රව්‍ය තොගයක් සමග ඉන්දීය ජාතිකයෙකු කටුනායක ගුවන්තොටුපලේදී අත්අඩංගුවට ගෙන තිබෙනවා.
කටුනායක පොලිස් මත්ද්‍රව්‍ය නාශක ඒකකයේ නිලධාරීන් සැකකරු අත්අඩංගුවට ගත්තේ හෂීස් මත්ද්‍රව්‍ය කිලෝග්‍රෑම් 1යි ග්‍රෑම් 280 ක් ද සමගයි. ඉන්දියාවේ සිට පැමිණි ඔහු සිය ගමන්මලු තුළ ඉතා සූක්ෂම ලෙස සගවාගෙන මෙම මත්ද්‍රව්‍ය දිවයිනට රැගෙන විත් තිබෙනවා. ඒවායේ වටිනාකම රුපියල් ලක්ෂ 20 ක අධික බවයි පොලිස් මත්ද්‍රව්‍ය නාශක ඒකකය පවසන්නේ.
ඇෆ්ගනිස්ථානයේ ජනාධිපතිවරණය ලබන ජූලි මාසයේදී පැවැත්වීමට කටයුතු යොදා ඇති බව එරට බලධාරීන් සදහන් කරනවා.
ඇෆ්ගනිස්ථානයේ ජනාධිපතිවරණ පැවැත්වීමට කටයුතු යොදා තිබුණේ ලබන අප්‍රේල් මාසයේදීයී. කෙසේ වෙතත් මැතිවරණය මාස තුනකින් කල් දමන බව මැතිවරණ කොමිසන් සභාව පසුගියදා නිවේදනය කළා. ඒ අනුව ජනාධිපතිවරණය ලබන ජුලි 20 වනදා පැවැත්වෙන බවයි නිවේදනය කරන්නේ. මෙලෙස මැතිවරණය කල්යෑමට හේතුවූයේ පසුගිය ඔක්තෝම්බර් මාසයේදී පැවති පාර්ලිමේන්තු මැතිවරණයේදී ඇති වූ තාක්ෂණික දෝෂයි. මැතිවරණ වංචා අවම කිරීම හේතුවෙන් ඇෆ්ගනිස්ථානය නව මැතිවරණ ක්‍රියාවලියක් හදුන්වා දුන්නා. එම ජයිමිතික හදුනාගැනීමේ පද්ධතිය ඇසුරින් වැඩ කරන ආකාරය මැතිවරණ කොමිසමේ නිලධාරීන්ගේ දැනුවත් භාවය අඩුවීම හේතුවෙන් මෙන්ම තවමත් ඡන්ද දායකයින් ලියාපදිංචි නොවීමත් මැතිවරණය කල්යෑමට හේතු වුණා.
පිලිපීනයේ ජල ගැලීම් වලින් විසි දෙදහසකට වැඩි පිරිසක් අවතැන් වුණා. ඉදිරි පැය 24 තුළත් ධාරානිපාත වැසි ඇති විය හැකි බවයි එරට කාළගුණ අංශ වාර්තා කළේ.
මධ්‍යම දිවයින හරහා හමා ගිය චණ්ඩ මාරුතයකින් පසු ජලගැලීම් හටගෙන තිබෙනවා. නායයාම් සහ දියේ ගිලීම් ඇතුලු අනතුරු වලින් විසි දෙදෙනෙකු මියගිය බවයි වාර්තා වුණේ.
කප්පම් මුදල් ඉල්ලමින් මරණීය තර්ජන කළ බව කියන සැකකරුවෙකු පෑලියගොඩ දිසා අපරාධ කොට්ඨාශය මගින් අත්අඩංගුවට ගෙන තිබෙනවා.
විවිධ ජංගම දුරකතන අංක ඔස්සේ ඇමතුම් ලබා දෙමින් කිරිබත්ගොඩ ප්රදේශයේ පදිංචි පුද්ගලයෙකුගෙන් සැකකරු රුපියල් ලක්ෂ තිහක කප්පම් මුදලක් ඉල්ලා තිබෙනවා. එම පුද්ගලයාට මරණීය තර්ජන ද එල්ලකර ඇති බවයි පොලිසිය ප්රකාශ කළේ. මේ සම්බන්ධයෙන් සිදු කෙරුණු විමර්ශනවලදී සැකකරු කඩවත ඉහළ බියන්විල ප්රදේශයේ දී අත්අඩංගුවට ගෙන තිබෙනවා. වයස අවුරුදු 30ක් වූ ඔහු එම ප්‍ර දේශයේ ම පදිංචි කරුවෙකු බවයි පොලිසිය ප්රකාශ කළේ. සැකකරු මහර මහේස්ත්‍රාත් අධිකරණයට අද ඉදිරිපත් කිරීමට නියමිතයි.
කාලගුණ විද්‍යා දෙපාර්තමේන්තුව ධීවරයන්ට හා නාවිකයන්ට අවවාදාත්මක නිවේදනයක් නිකුත් කළා.ඒ රළු මුහුදු ප්රදේශ සම්බන්ධයෙන්.
දිවයින වටා වන මුහුදු ප්රදේශවල සුළං ඊශාන දිසාවෙන් හමන අතර එහි වේඟය පැයට කිලෝ මීටර් 30ත් 40ත් අතර පවතනවා. මන්නාරම සිට පුත්තලම හා කොළඹ හරහා කළුතර දක්වා වෙරළට ඔබ්බෙන් වන මුහුදු ප‍්‍රදේහවල සුළඟේ වේඟය පැයට කිලෝ මීටර් 50ත් 60ක් පමණ දක්වා වැඩි විය හැකි බැවින් එම මුහුදු ප්රදේශ රළු විය හැකි බවයි දෙපාර්තමේන්තුව පෙන්වා දෙන්නේ.
මාතර සිට හම්බන්තොට හරහා පොතුවිල් දක්වා සහ මන්නාරම සිට කන්කසන්තුරය දක්වා වෙරළට ඔබ්බෙන් වන මුහුදු ප්රදේශවල සුළගේ වේඟය විටින් විට පැයට කිලෝ මීටර් 50ක් දක්වා වැඩි විය හැකි බව කාලගුණ විද්‍යා දෙපාර්තමේන්තුව සඳහන් කළා.
මේ අතර දිවයිනේ බොහෝ පළාත්වල වැසි රහිත කාලගුණ තත්ත්වයක් අපේක්ෂා කරන බවයි කාර්යයේ නියුතු කාලගුණ විද්‍යාඥ කසුන් පැස්කුවෙල් මහතා ප්රකාශ කළේ.
ඉන්දියාවේ මෙගාලයාහි ගල්අඟුරු පතලේ සිරවූවන් බේරා ගැනිමේ මෙහෙයුම්වල සුළු ප‍්‍රගතියක් පවතින බව එම කණ්ඩායම් ප්රකාශ කළා.
පසුගිය 13 වනදා සිටයි කම්කරුවන් 15 දෙනෙකු එහි සිරව සිටින්නේ. අඩි 300ක් පමණ ගැඹුරු පතල තුළ අඩි 70ක පමණ ජලය පිරි පවතිනවා. බේරා ගැනීමේ මෙහෙයුම් සඳහා නාවික හමුදා සාමාජිකයන් හය දෙනෙකුගෙන් යුත් කණ්ඩායමක් එක්ව සිටින බවයි ඉන්දීය මාධ්‍ය වාර්තා සඳහන් කළේ.
බංග්ලාදේශ මහමැතිවරණයෙන් එරට අගමැතිනී ෂෙයික් හසීනා ජයග්‍රහණය කර තිබෙනවා.
මෙම ජයග්‍රණයත් සමඟ අගමැතිනී ෂෙයික් හසීනා බංග්ලාදේශය දීර්ඝ කාලයක් පාලනය කළ රාජ්‍ය නායිකාව බවට පත් වනවා. ඇයගේ පාලක පක්ෂය මෙවර මැතිවරණයේදී පසුගිය මැතිවරණ වලටත් වැඩි විශිෂ්ඨ ජයග්‍රහණයක් ලබා ගෙන ඇති බවයි විදෙස් වාර්තා පෙන්වා දෙන්නේ. ඒ අනුව පාලක පක්ෂය මෙවර මැතිවරණයේදී පාර්ලිමේන්තුවේ ආසන 350 න් 281 ක් හිමිකර ගෙන ඇති බව සදහන්. මේ වන විට අගමැතිනී ෂෙයික් හසීනා වසර 07 ක් බංග්ලාදේශය පාලනය කර තිබෙනවා. එරට ප්‍රධාන විපක්ෂයට හිමිව ඇත්තේ පාර්ලිමේන්තුවේ ආසන 07 ක් පමණයි.
නව බස් රථ තුන් දහසක් මිළදී ගන්නා බව රාජ්‍ය අමාත්‍ය අශෝක් අබේසිංහ මහතා ප්රකාශ කළා. බස් රථ දහසක් නගරාන්තර සේවය සඳහා යෙදවීමයි මෙහි අරමුණවී තිබෙන්නේ. පළමු අදියර යටතේ බස් රථ 500ක් ඉන්දියාවෙන් ගෙන්වන බවත් අශෝක් අබේසිංහ මහතා පෙන්වා දුන්නා.
මල්වතු පාර්ශවයේ මහ නායක ස්වාමීන් වහන්සේ බැහැදැකීමෙන් අනතුරුව මාධ්‍ය අමතමින් රාජ්‍ය අමාත්‍යවරයා මේ බව ප්රකාශ කළා. ඉදිරි දින කිහිපය තුළ රට සීඝ‍්‍ර සංවර්ධනයකට යොමු කළ හැකි වැඩපිළිවෙලක් ඉදිරිපත් කිරිමටත් කටයුතු යොදා තිබෙනවා. එය කරුණු අටකින් සමන්විත බවයි අශෝක් අබේසිංහ මහතා පවසන්නේ.
උතුරේ ජල ගැලීමෙන් එක් ලක්ෂ විසි පන්දහසකට වැඩි පිරිසක් පීඩාවට පත්වූ බව ආපදා කළමණාකරන මධ්‍යස්ථානය ප්රකාශ කළා. නිවාස 500කට පූර්ණ හානි සිදුව තිබෙනවා. අර්ධ හානි සිදුවූ නිවාස සංඛ්‍යාව 4600ක්. උපරිමය ලක්ෂ 25 දක්වා වූ නිවාස හානි වන්දි ගෙවීමට කටයුතු සූදානම් කර ඇති බවයි ආපදා කළමණාකරණ මධ්‍යස්ථානයේ සහකාර අධ්‍යක්ෂ ප්රදීප් කොඩිප්පිලි මහතා සඳහන් කළේ.
මේ අතර ජල ගැලීම්වලින් විපතට පත්වුවන් පිළිබඳ වාර්තා හෙට ලබාගන්නා බව අමාත්‍ය රංජිත් මද්දුමබණ්ඩාර මහතා ප්රකාශ කළා. ඉදිරි සති දෙකක් සඳහා වියළි සළාක ඔවුන්ට ලබාදීමට තිරණය කර තිබෙනවා. තක්සේරු වාර්තා ලබාගැනිමෙන් අනතුරුව හානි වූ නිවාස සඳහා වන්දි ලබාදෙන බවයි අමාත්‍යවරයා සඳහන් කළේ.
නීතිවිරෝධි දුම්වැටි තොගයක් සමඟ පුද්ගලයෙක් කටුනායක ගුවයන් තොටුපලේදී අත්අඩංගුවට ගෙන තිබෙනවා.
ඔහු ඩුබායි සිට ශ්රී ලංකාවට පැමිණ තිබෙන්නේ එමිරේට්ස් ගුවන් යානයකින්. හරිත මාවත ඔස්සේ පිටතට යමින් සිටියදී එම පුද්ගලයා රේගු නිලධාරින්ගේ නිරික්ෂණයට ලක්වුණා. ඔහු ළඟ තිබී ලක්ෂ 11ක් වටිනා දුම්වැටි විසි දහසක් හමු වූ බවයි රේගුව පවසන්නේ.
බංගලිදේශයේ මැතිවරණය ආශ‍්‍රිතව හටගත් ගැටුම්වලින් පුද්ගලයන් පස් දෙනෙකු මියගියා. පාර්ශවකරුවන් ගණනාවක් අතර ගැටුම් හටගෙන තිබෙනවා.
ඡන්ද ප‍්‍රකාශය ආරම්භ වුණේ පෙරවරු 8ටයි. රටපුරා විශේෂ ආරක්ෂක වැඩපිළිවෙලක් ක්රියාත්මක කර තිිබෙනවා. හමුදා සහ පොලිස් කණ්ඩායම් ස්ථානගත කර ඇති බවයි බලධාරින් පවසන්නේ.
බ්‍රසීලයේ පවතින ගිනිඅවි සම්බන්ධ නීතිය ලිහිල් කිරීමට එරට නව ජනාධිපති ජේර් බොල්සොනාරෝ තීරණය කර තිබෙනවා.
බ්‍රසීලයේ ගිනිඅවි ළඟ තබා ගැනීම සම්බන්ධයෙන් ඉතා දැඩි නීති පවතිනවා. පොලීසිය හා ආරක්ෂක අංශ සාමාජිකයින්ට පමණක් ලියාපදිංචි ගිනි අවි ළඟ තබා ගත හැකි වීම, සාමාන්‍ය පුද්ගලයෙකු ලියාපදිංචි නොකළ ගිනිඅවියක් ළඟ තබා ගැනීම වසර 4 ක සිරදඬුවම් හිමිවන වරදක් ලෙස සැලකීම ආදිය එම නීති අතර වනවා. එසේම වෙඩි තැබීම් හේතුවෙන් වසරකට සැලකිය යුතු මරණ සංඛ්‍යාවක් ද සිදුවන බවයි බ්‍රසීල වාර්තා සඳහන් කරන්නේ. 2003 වසරේ ලෝකයේ වැඩිම ඝාතන සංඛ්‍යාවක් වාර්තා වූ රට ලෙස ද බ්‍රසීලය හැඳින්වෙනවා.
වචනයට පමණක් සීමා නොවී බුදුදහමට මුල්තැන ලබා දෙන බව අමාත්‍ය සජිත් ප්‍රේමදාස මහතා පවසනවා.
සියම් මහා නිකායේ අස්ගිරි පාර්ශ්වයේ මාතලේ දිසාවේ උප ප්‍රධාන සංඝනායක පුජ්‍ය අඹගස්වැවේ ශ්රී රාහුල නාහිමිපාණන් බැහැ දැකීමෙන් අනතුරුව අමාත්‍යවරයා මෙම අදහස් පළකලා. දඹුලු විහාරයේ සංවර්ධන කටයුතු පිළිබදවද මෙහිදී සාකච්ඡා කෙරුණා. අපවත් වී වදාළ සියම් මහා නිකායේ රංගිරි දඹුලු විහාර පාර්ශ්වයේ අනුනායක පූජ්‍ය කුඹුක්කදන්වල නන්දවිමල නාහිමිපාණන් වහන්සේගේ ශ්රී දේහයට අවසන් ගෞරව දැක්වීමට ද අමාත්‍යවරයා එක්වුණා.
ඇමරිකාවේ පුවත් පත් කිහිපයකට සයිබර් ප‍්‍රහාරයක් එල්ල වුණා. ඒවායේ මුද්‍රණ සහ බෙදාහැරීමේ ක‍්‍රියාවලියට ඉන් බාධා එල්ල වී තිබෙනවා. ලොස් ඇන්ජලිස් ටයිම්ස්, චිකාගේ ට‍්‍රයිබියුන් ඇතුළු පුවත් පත්වලට ගැටළු මතුව ඇති බවයි ජාත්‍යන්තර මාධ්‍ය සඳහන් කළේ. ප‍්‍රහාරය ඇමරිකාවට පිටතින් එල්ල වී ඇති බවත් විමර්ශනවලින් හෙළි වුණා.
කඩිනම් සංවර්ධන වැඩසටහනක් ඉදිරියේදී ක්රියාත්මක කරන බව රාජ්‍ය අමාත්‍ය අශෝක් අබේසිංහ මහතා ප්රකාශ කළා. එය කරුණු අටකින් සමන්විතයි.
පවතින තත්ත්වය අභිබවා සීග‍්‍ර සංවර්ධයක් අත්පත් කර ගැනීමයි අරමුණ. අංශ ගණනාවක් සම්බන්ධයෙන් විශේෂ අවධානය යොමු වුණා. ජනතා අභිවෘද්ධිය වෙනුවෙන් පුළුල් වැඩපිළිවෙල ක්රියාත්මක කරන බවයි අශෝක් අබේසිංහ මහතා පවසන්නේ.
බංගලිදේශයේ මැතිවරණ ප‍්‍රචණ්ඩ කි‍්‍රයා වලින් පුද්ගලයන් හතර දෙනෙක් ජීවිතක්ෂයට පත්වුණා. චිතගොන් ප්රදේශයේ ඡන්ද මධ්‍යස්ථානයක් ආශි‍්‍රතව ඇතිවූ ගැටුමකින් ඔවුන් මියගොස් ඇති බවයි පොලීසිය පවසන්නේ. ඒ අතර අවාමි ලීගයේ ප‍්‍රාදේශ්‍රීය දේශපාලන නායකයෙකු ද සිටින බව වාර්තා වෙනවා. ප්රදේශයේ විශේෂ ආරක්ෂක වැඩපිළිවෙලක් කි‍්‍රයාත්මක බවයි බංගලිදේශ ආරක්ෂක අංශ පවසන්නේ.
හෙට(31) සිට සුහුරු ජාතික හැදුනුම්පත් නිකුත් කරන බව පුද්ගලයන් ලියාපදිංචි කිරීමේ දෙපාර්තමේන්තුව ප්රකාශ කළා. පසුගිය දෙසැම්බර් 17 වෙනිදා සිට සිදුකළ අත්හදා බැලීම සාර්ථක බවයි කොමසාරිස් ජෙනරාල් වියානි ගුණතිලක මහතා පෙන්වාදෙන්නේ.
ඡායාරූප ලබාගැනීම සඳහා දිවයින පුරා ඡායාරූප ශාලා 2100 ක් ලියාපදිංචි කර තිබෙනවා. ඉන් ලබාගන්නා ඡායාරූප විද්්‍යුත් තැපෑල මගින් පුද්ගලයන් ලියාපදිංචි කිරීමේ දෙපාර්තමේන්තුවට යොමු කිරීමයි සැලසුම. නව ක්රමය මගින් හැදුනුම්පත් සඳහා විකෘත කළ හෝ වැරදි ඡායාරූප ඇතුලත් කිරීම සීමා වන බව ද පුද්ගලයන් ලියාපදිංචි කිරීමේ දෙපාර්තමේන්තුව පවසනවා.
සංචාරක කලාප අශ්‍රීතව සිදු කෙරුණු සංවර්ධන වැඩපිළිවෙල සමග විදෙස් සංචාරකයින්ගේ පැමිණීම තවදුරටත් ඉහළ ගොස් තිබෙනවා.
සංචාරක ආකර්ෂණය දිනාගත් ස්ථාන අතර පොළොන්නරුව ප්‍රදේශයට හිමිවන්නේ වැදගත් ස්ථානයක්. දිවයිනේ සංචාරක සංවර්ධන කටයුතු සදහා රජය විධිමත් වැඩපිළිවෙළක් ක්රියාත්මක කිරීමත් සමග පොළොන්නරුව ප්‍රදේශය ද සංවර්ධනයට ලක් කෙරුණා. මේ සමග දෙස් විදෙස් සංචාරකයන්ගේ පැමිණීම ද ඉහළ ගොස් තිබෙනවා. ජර්මනිය, ප්‍රංශය,ඉතාලිය සහ මැදපෙරදිග රටවල සංචාරකයින් විශාල පිරිසක් මේ දිනවල සංචාරයේ නිරතව සිටිනවා. විශාල පිරිසකට සංචාරක කර්මාන්තය ආශ්‍රිත රැකියා හිමිවීමෙන් ඔවුන්ගේ ආදායම ඉහළ යාමට ද මෙම තත්ත්වය හේතුවක්.
සෞඛ්‍ය අංශ කඩිනමින් ක්රියාත්මක වූ නිසා අයහපත් කාලගුණයත් සමග ඇති වූ ජලගැලීම් තත්ත්වය හේතුවෙන් බෝවන රෝග පැතිර යාම පාලනය කර ගැනීමට හැකි වී ඇති බව අමාත්‍ය රාජිත සේනාරත්න මහතා පවසනවා.
කිලිනොච්චිය සහ මුලතිව් දිස්ත්‍රික්කයන්හි ජල ගැලීම් හේතුවෙන් පීඩාවට පත්වූවන් රැදී සිටින අවතැන් කදවුරු නිරීක්ෂණයට පැමිණි අවස්ථාවේදීයී අමාත්‍යවරයා මේ බව ප්රකාශ කළේ.
ජනතාවගේ සුවදුක් විමසා බැලීමට අමාත්‍යවරයා මෙහිදී කටයුතු කළා. සෞඛ්‍ය පෝෂණ හා දේශීය වෛද්‍ය අමාත්‍යාංශය සහ එම අමාත්‍යාංශය යටතේ පවතින ආයතන මගින් එක්රැස් කළ රුපියල් කෝටි 02කට අධික වටිනාකමකින් යුත් වියළි ආහාර, සනීපාරක්ෂක ද්‍රව්‍ය සහ ඖෂධ ඇතුළු ආධාර එම ජනතාව වෙත පරිත්‍යාග කිරීමද මෙහිදී සිදු කෙරුණා.
දිවයිනේ බොහෝ පලාත්වල ප්‍රධාන වශයෙන් වැසි රහිත වියලි කාලගුණ තත්ත්වයක් සහ ශීත උදෑසන සහ රාත්‍රී කාලයන් අපේක්ෂා කරන බව කාලගුණ විද්‍යා දෙපාර්තමේන්තුව පවසයි.කෙසේවෙතත් නැගෙනහිර පළාතෙත් බදුල්ල සහ මාතලේ දිස්ත්‍රික්කවලත් සිහින් වැසි ඇති විය හැක.මධ්‍යම, වයඹ, උතුරු සහ ඌව පළාත්වලත් හම්බන්තොට දිස්ත්‍රික්කයේත් විටින් විට හමන පැ.කි.මී. 40 දක්වා තරමක් තද සුළං ඇතිවිය හැක.සබරගමුව සහ බස්නාහිර පළාත්වල සමහර ප්රදේශවල උදය කාලයේ දී මීදුම් සහිත තත්ත්වයක් බලාපොරොත්තු වේ.
නැගෙනහිර මුහුදු ප්රදේශවල සිහින් වැසි ඇති විය හැකි අතර දිවයින වටා වන සෙසු මුහුදු ප්රදේශවල වැසි රහිත කාලගුණ තත්ත්වයක් පවතී.දිවයින වටා වන මුහුදු ප්රදේශවල සුළං ඊසාන දිශාවෙන් හමන අතර සුළගේ වේගය පැ.කී.මී. 25-35 පමණ වේ.මාතර සිට හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්රදේශවල සහ කන්කසන්තුරය සිට මන්නාරම, පුත්තලම, කොළඹ හරහා කළුතර දක්වා වෙරළට ඔබ්බෙන් වන මුහුදු ප්රදේශවල සුළගේ වේගය විටින් විට පැ.කී.මී. 50 පමණ දක්වා වැඩි විය හැකි අතර මුහුදු ප්රදේශ තරමක් රළු විය හැකි බව කාලගුණ විද්‍යා දෙපාර්තමේන්තුව පවසයි.
විපක්ෂ නායක මහින්ද රාජපක්ෂ මහතා අනුරාධපුර ජය ශ්රී මහා බෝධීන් වහන්සේ වැදපුදාගෙන ආශිර්වාද ලබා ගත්තා.
අටමස්ථානාධිපති ආචාර්ය පූජ්‍ය පල්ලේගම සිරිනිවාස ස්වාමීන්වහන්සේ බැහැදුටු විපක්ෂ නායකවරයා ඉන් අනතුරුව ජය ශ්රී මහා බෝධීන් වහන්සේ අභියසදී ආගමික වතාවත්වල නිරත වුණා. ඉන් අනතරුව මාධ්‍යවේදීන් නැගූ ප්‍රශ්නවලට පිළිතුරු ලබා දුන් විපක්ෂ නායක මහින්ද රාජපක්ෂ මහතා.
මේ අතර හිටපු රාජ්‍ය අමාත්‍ය පාලිත රංගේ බණ්ඩාර මහතාද ජය ශ්රී මහා බෝධීන් වහන්සේ අභියසදී ආගමික වතාවත්වල නිරත වුණා. මාධ්‍ය හමුවේ අදහස් පල කළ හිටපු රාජ්‍ය අමාත්‍ය පාලිත රංගේ බණ්ඩාර මහතා.