ජාතික ඉන්ධන බලපත්‍රය සදහා ඊයේ රාත්‍රිය වන විට මිලියන 4 ක් ලියාපදිංචි වී ඇති බව බලශක්ති අමාත්‍ය කංචන විජේසේකර මහතා ට්විටර් පණිවුඩයක් නිකුත් කරමින් පෙන්වා දුන්නා.
මේ අතර QR ක්‍රමවේදය යටතේ ඉන්ධන නිකුත් කිරීමේ කටයුතුද පිරවුම්හල් රැසකදී සාර්ථකව ක්‍රියාත්මකයි.
සිපෙට්කෝ ඉන්ධන පිරවුම්හල් 299 ක හා අයි ඕ සී පිරවුම්හල් 34 කදී අනූදෙදහස් අටසිය හතළිස් පස් දෙනෙකු ගණුදෙනු සම්පූර්ණ කිරීමට QR ක්‍රමවේදය අනුගමනය කර ඇති බව අමාත්‍ය කංචන විජේසේකර මහතා පවසනවා.
හොරණ කුළුපන ඉන්ධන පිරවුම්හලෙහි කිව් ආර් කේතය භාවිත කරමින් ඉන්ධන ලබාදීම පළමුවරට සාර්ථකව සිදු කෙරුණා. ජනතාව මෙහිදී සදහන් කළේ මෙම ක්‍රමවේදය සම්බන්ධයෙන් තමන් සතුටු වන බවයි.
ගාල්ල ප්‍රදේශයේ ඉන්ධන පිරවුම්හල් රැසකම කිව් ආර් ක්‍රමවේදය යටතේ ඉන්ධන බෙදාදීම සිදුවනවා. අනවශ්‍ය තදබදයකින් තොරව මෙමගින් ඉන්ධන ලබා ගැනීමට හැකි වන බවයි ජනතාව පවසන්නේ.
ගෑස් සැපයුමද අඛන්ඩව සිදු කෙරෙන අතර ගෑස් මෙට්‍රික්ටොන් තුන්දහස් නවසියයක් රැගත් නෞකාවක් දිවයිනට අද ළගා වීමට නියමිතයි. දිවයිනට පැමිණ ඇති නෞකා දෙකේ ගෑස් ගොඩබෑමද මේ වනවිට ආරම්භ වී තිබෙනවා.
මේ අතර අද දිනයේද ගෑස් සිලින්ඩර් එක්ලක්ෂ හතළිස් දහසක් වෙළෙදපොළට නිකුත් කිරීමට කටයුතු යොදා ඇති බව ලිට්‍රෝ සමාගම පවසනවා. ඉන් ගෑස් සිලින්ඩර ලක්ෂයක් කිලෝග්‍රෑම් 12 යි දශම පහක් වූ ගෑස් සිලින්ඩර බවයි එම සමාගම පෙන්වා දෙන්නේ. ගෝනාපීනුවල ප්‍රදේශයේ ජනතාවට දින ගණනාවකට පසු ලිට්‍රෝ ගෑස් බෙදාදීමට කටයුතු කෙරුණා. එහෙත් ප්‍රමාණවත් පරිදි ගෑස් නොලැබීම හේතුවෙන් ජනතාව අසීරුතාවට පත් වුණා.
The post ජාතික ඉන්ධන බලපත්‍ර සඳහා ලියාපදිංචි වූ ගණන මිලියන 4 ඉක්මවයි appeared first on ITN News.
Post a Comment