ව්‍යාපාරික ස්ථානයක් සතු සියලුම රථ වාහන එම ව්‍යාපාරයේ ලියාපදිංචි අංකය සමග නව ක්‍රමය යටතේ ඉන්ධන ලබාගැනීමට ලියාපදිංචි කිරීම අද සිට සිදු වනවා.
ජාතික ඉන්ධන අවසරපත මගින් ව්‍යාපාරයකට ඇති සියලුම රථවාහන ලියාපදිංචි කිරීමේ වැඩපිළිවෙල අද සිට ක්‍රියාත්මක වනවා. ඉන්ධන අවශ්‍යතා ඇති අනෙකුත් යන්ත්‍ර සූත්‍ර සහ උපකරණවල විස්තර ලබාදී අදාළ ප්‍රාදේශීය ලේකම් කාර්යාලයේ ලියාපදිංචි කළ යුතු වනවා. එම උපකරණවලට සතිපති අවශ්‍ය කෙරෙන ඉන්ධන ප්‍රමාණය ද සදහන් කළ යුතු බවයි අමාත්‍ය කංචන විජේසේකර මහතා ට්විටර් සටහනක් තබමින් ප්‍රකාශ කරන්නේ.
කුරුණෑගල පන්නල මාකදුර ප්‍ර දේශයේ යල කන්නයේ අස්වනු නෙලීමට ආසන්න වී පැවතිය ද ඒ සදහා යොදාගන්නා යන්ත්‍රවලට ප්‍රමාණවත් තරම් ඉන්ධන නොලැබීම හේතුවෙන් ගැටලු රැසක් මතුව තිබෙනවා. මාකදුර වෙල්යායේ අක්කර 850 ක පමණ මෙවර වී වගාව සිදු කර ඇති අතර අස්වනු නෙලීමට නොහැකි තත්ත්වයක් මතුව ඇති බවයි ගොවීන් හා අස්වනු නෙලීමේ යන්ත්‍ර හිමිකරුවන් ප්‍රකාශ කරන්නේ.
ඉන්ධන පිරවුම්හල්වලට දිනපතා ඉන්ධන නොලැබීම හේතුවෙන් වාහනයේ අවසන් අංකය අනුව ඉන්ධන නිකුත් කිරීම ඇතැම් ප්‍රදේශවල ගැටලුවක් වී තිබෙනවා. වැලිමඩ හා කැප්පටිපොල යන ඉන්ධන පිරවුම්හල්වල මේ අනුව දිගු පෝලිම් දැකගත හැකියි.
කෙසේ වුවද කිව්.ආර් කේත ක්‍රමය යටතේ ඉන්ධන නිකුත් කරන බොහෝ පිරවුම්හල්වල ගැටලු අවම මට්ටමක පවතින බවයි අප වාර්තාකරුවන් සදහන් කරන්නේ. රාගම පොලිස් ස්ථානයේ නිලධාරීන්ගේ සහාය ඇතිව රාගම ඇලපිටිවෙල ඉන්ධන පිරවුම්හලේදී රථ වාහන සදහා කිව් ආර් කේතය ලබාදීම සිදු කෙරෙනවා.මේ පිළිබද ජනතාව ද ප්‍රසාදය පල කරනවා.
කිව් ආර් කේත පරික්ෂා කිරීමේ වැඩසටහනක් පුත්තලම විවිධ සේවා සමූපකාර සමිති ඉන්ධන පිරවුම්හලේදී සිදු වුණා. පාරිභෝගිකයන් සිය දෙනෙකු සහභාගී කරගනිමින් මෙම පරික්ෂාව සිදු කෙරුණා. ලංකා ඛණිජතෙල් නීතිගත සංස්ථාවේ පුත්තලම දිස්ත්‍රික් කළමනාකරු, පුත්තලම ඉන්ධන පිරවුම්හලේ කළමණාකරු මෙන්ම සමූපකාර සමිතියේ සභාපතිවරයා ද මෙම කටයුතු අධීක්ෂණයට එක්ව සිටියා.
The post ව්‍යාපාරික ආයතනවල QR ලියාපදිංචියට නව ක්‍රමවේදයක් appeared first on ITN News.
Post a Comment