අරගලකරුවන් පිරිසක් ලිප්ටන් වටරවුම අසලින් විරෝධතා පාගමනක් ආරම්භ කළා. සමාජවාදී තරුණ සංගමයයි මෙය සංවිධානය කර තිබුනේ. මේ හේතුවෙන් විශේෂ ආරක්ෂාවක් ද එම ප්‍රදේශයේ යොදවා තිබෙනු දක්නට ලැබුණා. විරෝධතා පා ගමන ලිප්ටන් වටරවුමේ සිට කොටුව දුම්රිය ස්ථානය දක්වා ගමන් කිරීමට සැලසුම් කර තිබුණා. කෙසේ වෙතත් ඩීන්ස් පාර ඔස්සේ මරදාන දෙසට විරෝධතාකරුවන් ගමන් කිරීමට උත්සහ කිරීමේ දී සෞඛ්‍ය අමාත්‍යාංශය ඉදිරිපිටදී ජල හා කදුලු ගෑස් ප්‍රහාර එල්ල කිරීමට පොලිසීය කටයුතු කළා.
මෙහිදි නීතිවිරෝධි අයුරින් හැසිරුණු පුද්ගලයන් 83 දෙනෙකු පොලිසීය අත්අඩංගුවට ගෙන තිබෙනවා. පවතින නීතිමය ප්‍රතිපාදන අනුව මෙය නිතිවිරෝධි පෙළපාලියක් වන බැවින් විරෝධතාකරුවන්ට විසිර යන ලෙසට දැනුම් දුන් බවයි පොලිසිය පවසන්නේ. කෙසේ වෙතත් අවස්ථා කිහිපයකදීම පොලිස් අවවාද නොකතමින් විරෝධතාකරුවන් ක්‍රියා කළ බව පොලිසිය සඳහන් කරනවා. ඒ අනුව මහජනතාවට බාධා ඇති වීම, පෞද්ගලික හා රාජ්‍ය දේපලවලට හානී ඇතිවීමේ අවධානම, අධි ආරක්ෂිත කලාපවලට විරෝධතා කරුවන් ඇතුළු වීමේ අවධානම ආදි කරුණු සලකා බලමින් මෙම පිරිස අත්අඩංගුවට ගෙන තිබෙනවා. අත්අඩංගුවට ගත් පිරිස අතර පිරිමි පුද්ගලයන් 77ක් සහ කාන්තාවන් 04 දෙනෙක් සහ ස්වාමීන්වහන්සේ දෙනමක් සිටිනවා. කොළඹ දිසාව භාර නියෝජ්‍ය පොලිස්පතිවරයාගේ සෘජු අධික්ෂණය යටතේ ඉදිරි විමර්ෂන සිදුකරමින් අත්අඩංගුවට ගත් පුද්ගලයින් සම්බන්ධව නීත්‍යානුකූලව කටයුතු කරන බව පොලිසිය පවසනවා.
මේ අතර අත්අඩංගුවට පත් විරෝධතාකරුවන් බැලීම සඳහා ජනතා විමුක්ති පෙරමුණේ නායක පාර්ලිමේන්තු මන්ත්‍රී අනුර කුමාර දිසානායක මහතා මරදාන පොලිසිය වෙත පැමිණියා.
The post විරෝධතාකරුවන් 83 දෙනෙකු අත්අඩංගුවට appeared first on ITN News.
Post a Comment