ජපානයට බලපා ඇති නාන්මඩෝල් සුළි කුණාටුව හේතුවෙන් නායයාම් හා ගංවතුර තත්ත්වයක් හටගෙන තිබෙනවා.
සුළි කුණාටුවෙන් පුද්ගලයින් දෙදෙනෙකු ජීවිතක්ෂයට පත්ව ඇති අතර තවත් 90 දෙනෙකු පමණ තුවාල ලබා ඇති බව වාර්තා වනවා. එමෙන්ම එක් පුද්ගලයෙකු අතුරුදන් බවයි සහන කණ්ඩායම් පවසන්නේ. දකුණු කියුෂු දූපතෙන් නාන්මඩෝල් සුළි කුණාටුව ජපානයට ඇතුළු වූ අතර එය පැයට කිලෝමීටර් 234 ක පමණ ප්‍රබලත්වයකින් යුතුයි. නිවාස 350,000 කට අධික සංඛ්‍යාවක විදුලිබලය ඇණහිට ඇති බව සහන කණ්ඩායම් සදහන් කරනවා. මිලියන 9 ක පමණ පිරිසක් ආරක්ෂිත ස්ථාන කරා යොමු කිරීමටයි පියවර ගෙන ඇත්තේ.
මේ අතර ජපානයේ ටෝකියෝ අගනුවරට ද මේ වනවිට අධික වර්ෂාවෙන් බලපෑම් ඇතිවී තිබෙනවා. විදුලි දුම්රිය, බෝට්ටු සේවා, ගුවන් ගමන් තාවකාලිකව අත්හිටුවා ඇති අතර වෙළෙදසැල් හා සාප්පු සංකීර්ණ ද වසා දැමීමටයි පියවර ගෙන ඇත්තේ.
The post නාන්මඩෝල් සුළි කුණාටුව හේතුවෙන් ජපානයට නායයාම් හා ගංවතුර තත්ත්වයක් appeared first on ITN News.
Post a Comment