විස්සයි විස්ස ලෝක කුසලාන ක්‍රිකට් තරගාවලියේ ශ්‍රී ලංකාව හා දකුණු අප්‍රිකාව අතර තරගය සාජාහිදී අද පැවැත්වෙනවා.
ශ්‍රී ලංකාවට අවසන් පූර්ව වටයට පිවිසීම සදහා මෙම තරගය ජයග්‍රහණය කිරීම ඉතා වැදගත් වනවා. සුපිරි 12 වටයේ ශ්‍රී ලංකා කණ්ඩායම මෙන්ම දකුණු අප්‍රිකා කණ්ඩායම ද එක් තරගය බැගින් මේ වනවිට ජයග්‍රහණය කර තිබෙනවා. තරගය අද පස්වරු 3.30 ට ආරම්භවීමට නියමිතයි.
ඕස්ට්‍රේලියාව හා එංගලන්තය අතර තරගය ද අද රාත්‍රියේ පැවැත්වෙනවා.
මේ අතර ඊයේ පැවති පාකිස්තානය හා ඇෆ්ගනිස්ථානය අතර තරගය කඩුලු පහක ජයක් හිමිකර ගැනීමට පාකිස්තාන කණ්ඩායම සමත් වුණා. තරගයේ පළමුවෙන් පන්දුවට පහරදුන් ඇෆ්ගනිස්ථාන කණ්ඩායම නියමිත පන්දුවාර 20 අවසානයේ කඩුලු 6 ක් දැවී ලකුණු 147 ක් ලබාගත්තා. මොහොමඩ් නබී නොදැවී ලකුණු 35 යි. පිළිතුරු ඉණිම ක්‍රීඩා කළ පාකිස්තාන කණ්ඩායම පන්දුවාර 19 ක් අවසානයේ දී කඩුලු 5 ක් දැවී තිබියදී ජයග්‍රාහී ඉලක්කය පසුකළා. ජයග්‍රහණය සදහා අවසාන පන්දුවාර දෙකේ ද ලකුණු 24 ක් ලබාගත යුතුව තිබුණ ද එම ඉලක්කය හයේ පහර 4 කින් 19 වන පන්දුවාරය තුළදීම සම්පූර්ණ කළ අසිප් අලි පාකිස්තාන ජයග්‍රහණයේ නියමුවා වුණා.
The post ශ්‍රී ලංකා – දකුණු අප්‍රිකා තරගය අද appeared first on ITN News.
Post a Comment