අධිකරණයට අපහාස කිරීමේ දෙවන නඩුවට අදාළ චෝදනාවට හිටපු මන්ත්‍රී රන්ජන් රාමනායක මහතා ශ්‍රේෂ්ඨාධිකරණය හමුවේ වරද පිළිගත්තා. තමා නිවැරදිකරු යැයි මීට පෙර අධිකරණය හමුවේ කළ ප්‍රකාශය ඉවත් කර ගන්නා බවයි වරද පිලිගනිමින් ඔහු සදහන් කළේ.
මෙම පැමිණිල්ල අද කැදවූ අවස්ථාවේ රන්ජන් රාමනායක මහතාගේ නීතිඥවරයා කියා සිටියේ අදාළ චෝදනාවලයට නිවැරදිකරු යැයි තම සේවාදායකයා මීට පෙර කර තිබූ ප්‍රකාශය ඉවත් කරගෙන වැරදිකරු යන උත්තරවාදය ඉදිරිපත් කිරීමට සූදානම් බවයි. ඒ අනුව ත්‍රිපුද්ගල විනිසුරු මඩුල්ල රාමනායක මහතා අධිකරණය හමුවට කැදවා ඒ පිළිබද විමසීමක් සිදු කළා. එහිදීයී රාමනායක මහතා සිය වරද පිළිගත්තේ. කෙසේ වෙතත් මෙම චෝදනාවට අදාළ රූපවාහිනී වැඩසටහනේදී තමන් කළ ප්‍රකාශය තුළ ශ්‍රේෂ්ඨාධිකරණයට අපහාසයක් නින්දාවක් හෝ හෑල්ලුවට ලක් කිරීමේ චේතනාවක් නොතිබූ බවද ඔහු ප්‍රකාශ කළා. පැමිණිල්ලට අදාළ ලිඛිත දේශන ඇත්නම් මැයි 04 වනදා ගොණු කරන ලෙස ශ්‍රේෂ්ඨාධිකරණය නියෝග කළා. තීන්දුව ප්‍රකාශ කිරීම දින නියමයක් නොමැතිව කල් දැමුවා.
The post රන්ජන් වරද පිළිගෙන ශ්‍රේෂ්ඨාධිකරණයෙන් සමාව ඉල්ලයි appeared first on ITN News.
Post a Comment