තායිලන්තයේ ගුහාවක් තුළ අතුරුදන් වූ පාපන්දු කණ්ඩායමේ සාමාජිකයන් සහ පුහුණුකරු සොයා තවදුරටත් මෙහෙයුම් සිදු කෙරෙනවා. ඔවුන් ගුහාව තුළ අතුරුදන්වී අදට දින 07 ක් ගත වනවා. උතුරුදිග තායිලන්තයේ චියැංරායි ප්‍රදේශයේ ගුහාවක ඔවුන් අතුරුදන් වුණේ පසුගිය සෙනසුරාදායි. ධාරානිපාත වර්ෂාව හේතුවෙන් ඔවුන් මෙම ගුහාව තුළට ගොස් සිරවී සිටින බවටයි සැක පල කෙරෙන්නේ. වයස අවුරුදු 11 ත් 16 ත් අතර දරුවන් 12 දෙනෙකු සහ 25 හැවිරිදි ඔවුන්ගේ පාපන්දු පුහුණුකරු මෙලෙස අතුරුදන්වී තිබෙනවා. ඔවුන්ගේ පාපැදි සහ සපත්තු එම ගුහාව ආසන්නයේ තිබියදී සොයා ගැනුණා. ඔවුන් සෙවීමේ මෙහෙයුම් සදහා ජාත්‍යන්තර මෙහෙයුම් කණ්ඩායම්ද එක්ව සිටිනවා.
ගුහාව තුළ ජලය පිරී තිබීම හේතුවෙන් මෙහෙයුම් කටයුතු වලට බාධා එල්ල වී ඇති බව ද මෙහෙයුම් කණ්ඩායම් සදහන් කරනවා. ඩ්‍රෝන යානා හා සුනඛයින් ද යොදා ගනිමින් පසුගිය දින කිහිපයේම සෝදිසි මෙහෙයුම් සිදු කළද මේ වන තෙක් කිසිදු තොරතුරක් හෙළිව නැහැ.
Post a Comment