ගිනිකොණ දිග බෙංගාල බොක්ක මුහුදු ප‍්‍රදේශයේ ශ‍්‍රී ලංකාවට නැගෙනහිර දෙසින් පවතින ෆොනි සුළි කුණාටුව ඉදිරි පැය කිහිපයතුළදී චණ්ඩ සුළි කුණාටුවක් දක්වා වර්ධනය වනු ඇතැයි කාලගුණ විද්‍යා දෙපාර්තමේන්තුව පවසනවා. ඒ අනූව නැගෙනහිර, ගිනිකොණ, ඊසාන සහ උතුරු දෙසින් වන බෙංගාල බොක්ක මුහුදු ප‍්‍රදේශයේ නැවත දැනුම්දෙන තුරු ධීවර සහ නාවික කටයුතුවලින් වැළකී සිටින ලෙසයි දෙපාර්තමේන්තුව දැනුම්දෙන්නේ.
මේ සම්බන්ධව නිකුත් කෙරෙන ඉදිරි නිවේදන පිළිබඳ අවධානයෙන් පසුවන ලෙස ද කාර්යයේ නියුතු කාලගුණ විද්‍යාඥ බුද්ධික බන්දුරත්න මහතා සඳහන් කළා.
සුළි කුණාටු පද්ධතියේ බලපෑම හේතුවෙන් ලබන බදාදා දක්වා දිවයින හරහා වැසි සහ සුළං තත්ත්වයේ වැඩි වීමක් අපේක්ෂා කෙරෙනවා. සබරගමුව, මධ්‍යම, දකුණ, බස්නාහිර සහ වයඹ පළාත්වලට මිලි මීටර 150ක පමණ තද වැසිද ඇති විය හැකියි.
Post a Comment