දුම්රිය මගියෙකුගේ පහරදීමක් හේතුවෙන් ධාවනය වෙමින් තිබූ දුම්රියෙන් බිම ඇද වැටුණු දුම්රිය ආරක්ෂක නිලධාරියෙකු ජීවිතක්ෂයට පත් වුණා.
කොළඹ කොටුවෙන් ඊයේ රාත්‍රි දහයයි තිහට කන්කසන්තුරේ බලා ගමන් ආරම්භ කළ නගරාන්තර දුම්රියේ ගමන් ගත් පුද්ගලයන් දෙදෙනෙකු එම දුම්රියේ ආරක්ෂක නිලධාරින් සමග බහින්බස් වීමක් සිදුව තිබෙනවා. එහිදී එක් අයෙකු එල්ල කළ පා පහරක් දුම්රිය ආරක්ෂක නිලධාරියෙකුට වැදීමෙන් ධාවනය වෙමින් තිබූ දුම්රියෙන් ඔහු ඇද වැටී තිබෙනවා.
ඊයේ රාත්‍රි එකොළහයි විස්සට පමණ වේයන්ගොඩ වදුරව දුම්රිය ස්ථානය අසලදී මෙම නිලධාරියා දුම්රියෙන් ඉවතට වැටී මෙසේ ජීවිතක්ෂයට පත් වුණා. ඔහු ගම්පහ ඉහළයාගොඩ ප්‍රදේශයේ පදිංචි අයෙක්. ලක්ෂමන් දිසානායක නමැති මෙම ආරක්ෂක නිලධාරියා දුම්රිය ආරක්ෂක හමුදාවේ තූර්යවාදක කණ්ඩායමේ ප්‍රධානියා බවයි වාර්තා වන්නේ.
දුම්රිය තුළ මත්පැන් පානය කරමින් ගමන් කරමින් සිටි පුද්ගලයන් දෙදෙනෙකු පිළිබද දුම්රිය ප්‍රවේශ පත් පරීක්ෂකවරුන් සිදු කළ දැනුම්දීමකට අනුව ආරක්ෂක නිලධාරීන් පැමිණ ඔවුන් දෙදෙනා පරීක්ෂා කිරීමට යාමේදීයි මෙම තත්ත්වය ඇති වී තිබෙන්නේ.
ඔවුන් දෙදෙනා සතුව දුම්රිය ප්‍රවේශ පත්‍රද නොතිබූ බවයි අනෙක් දුම්රිය ආරක්ෂක නිලධාරියා සදහන් කළේ. ඔවුන් අවුරුදු 31 හා 23 යන වයස්වල පසුවන නොච්චියාගම හා අනුරාධපුර යන ප්‍රදේශවල පදිංචිකරුවන් බව හදුනාගෙන තිබෙනවා. සැකකරුවන් මේ වන විට අත්අඩංගුවේ පසුවනවා.
The post මගියෙකුගෙන් පහරකෑ දුම්රිය ආරක්ෂක නිලධාරියෙකු ජීවිතක්ෂයට appeared first on ITN News.
Post a Comment