මෙරට ඉතිහාසයේ අනුප්‍රාප්තික ජනාධිපතිවරයෙකු පත්කර ගැනීම සදහා පළමුවරට පාර්ලිමේන්තු ඡන්දයක් පැවැත්වීමට අදාළ නාමයෝජනා භාරගැනීම අද සිදුකෙරෙනවා. ජනාධිපතිවරණයේ දී සහාය දීම සම්බන්ධයෙන් තීරණාත්මක සාකච්ඡා කිහිපයක් මේ වනවිටත් පවත්වා තිබෙනවා. මේ අතර අද පාර්ලිමේන්තුව අවට දැඩි ආරක්ෂාවක් යොදවා තිබෙනු දැකගත හැකිවුණා.
ගෝඨාභය රාජපක්ෂ මහතා ජනාධිපති ධුරයෙන් ඉවත්වීමත් සමග ඉතිරි ධුර කාලය සදහා නව ජනාධිපතිවරයෙකු තෝරාගැනීමට අදාල නාම යෝජනා බාර ගැනිම අද සිදුවනවා. ඒ සදහා උදෑසන දහයට පාර්ලිම්න්තුව රැස් වීමට නියමිතයි. නාම යෝජනා භාර ගැනීමේ ක්‍රියාවලිය මේහෙය වන්නේ පාර්ලිමේන්තු මහ ලේකම් ධම්මික දසනායක මහතායි. පාර්ලිමේන්තු ආරම්භයේ දී නාමයෝජනා භාර දෙන ලෙස මහ ලේකම්වරයා පාර්ලිමේන්තුවට දැනුම් දීම සිදු කෙරෙනවා. එහි දී දේශපාලන පක්ෂ අපේක්ෂකයින් යෝජනා ඉදිරිපත් කළ යුතුයි. එය ස්ථිර කිරීම ද අනිවාර්ය වන අතර අපේක්ෂක මන්ත්‍රීවරයා එම අවස්ථාවේ සභා ගර්භයේ රැදී සිටිය යුතු වෙනවා. එසේ නොවුවහොත් එම යෝජනාව ප්‍රතික්ෂේප වනු ඇති. ඊට අමතරව යෝජනා වන මන්ත්‍රීවරයා තමන් තරග කිරීමට කැමති බව ලිඛිතව පාර්ලිමේන්තු මහ ලේකම්වරයාට දැනුම් දිය යුතුයි. කතානායකවරයා හැර ඕනෑම මන්ත්‍රීවරයෙකුට අපේක්ෂකයෙකු ලෙස ඉදිරිපත් වීමේ අවස්ථාවද පවතිනවා. කතානායකවරයාට අපේක්ෂකයෙකු ලෙස ඉදිරිපත් විය නොහැකි වුවද ඡන්දය භාවිත කිරීමේ අවස්ථාව හිමි වී තිබෙනවා.
නාමයෝජනා භාරගැනීමෙන් අනතුරුව පාර්ලිමේන්තු මහ ලේකම්වරයා නාමයෝජනා භාරදුන් අපේක්ෂකයින් කවුරුන්ද යන්න පිළිබදව පාර්ලිමේන්තුව දැනුවත් කිරීමට නියමිතයි. එක් අපේක්ෂකයෙක් පමණක් නාමයෝජනා භාරදී ඇත්නම් එදිනම එම පුද්ගලයා ජනාධිපතිවරයා ලෙස පත්කරනු ලබනවා. එක් මන්ත්‍රීවරයෙකුට වඩා වැඩි දෙනෙකුගේ නම් යෝජනා කර ස්ථිර වුවහොත් ඡන්ද විමසීමක් පැවැත්වීම සිදු කළ යුතුයි.
ඡන්ද විමසීමේ දී ඡන්දය භාවිත කරනු ලබන මන්ත්‍රී සංඛ්‍යාවෙන් සියයට 50 ට වැඩි ප්‍රතිශතයක් ලබාගන්නා අපේක්ෂකයා නව ජනාධිපතිවරයා වශයෙන් තේරී පත්වනවා. වැඩබලන ජනාධිපති රනිල් වික්‍රමසිංහ, විපක්ෂ නායක සජිත් ප්‍රේමදාස, ජනතා විමුක්ති පෙරමුණේ නායක අනුර කුමාර දිසානායක සහ ශ්‍රී ලංකා පොදු ජන පෙරමුණේ පාර්ලිමේන්තු මන්ත්‍රී ඩලස් අලහප්පෙරුම යන මහත්වරුන් මේ වන විට ජනාධිපතිවරණය සදහා ඉදිරිපත් වන බවට ප්‍රකාශ කර තිබෙනවා.
The post අනුප්‍රාප්තික ජනපති තෝරාගැනීමට නාමයෝජනා කැඳවීම අද appeared first on ITN News.
Post a Comment