හෙට දිනයේ අලුත් කැබිනට් මණ්ඩලයක් දිවුරුම්දීමට නියමිත බව දේශපාලන ආරංචි මාර්ග සඳහන් කරනවා. මේ සම්බන්ධව ජනාධිපති ගෝඨාභය රාජපක්ෂ මැතිතුමාගේ ප්‍රධානත්වයෙන් හිටපු කැබිනට් මණ්ඩලය සමඟ ඊයේ දිනයේදී සාකච්ඡා කළ බවයි වාර්තා වන්නේ.
ආණ්ඩුවේ ඉදිරි වැඩකටයුතු සම්බන්ධව විශේෂ සාකච්ඡා දෙකක් ජනාධිපතිතුමාගේ ප්‍රධානත්වයෙන් ඊයේ පැවැත්වුණා. එම එක් සාකච්ඡාවකට දැනට ඇමති ධුර හොබවන දිනේෂ් ගුණවර්ධන, ජොන්ස්ටන් ප්‍රනාන්දු සහ අලි සබ්රි යන මහත්වරුන් එක්ව සිටියා. ඉන්පසුවයි පසුගියදා අමාත්‍ය ධුර වලින් ඉල්ලා අස්වූ හිටපු කැබිනට් ඇමතිවරුන් ජනාධිපතිතුමා සමඟ සාකච්ඡාවට එක්වුනේ. කටයුතු පවත්වාගෙන යාම සඳහා සීමා සහිත කැබිනට් මණ්ඩලයක් පත්කිරීමේ අවශ්‍යතාවක් පවතින බව මෙහිදී ජනාධිපතිතුමා පෙන්වාදි තිබෙනවා. එමෙන්ම නව කැබිනට් මණ්ඩලයේ තනතුරු කිසිවක් තමන් බලාපොරොත්තු නොවන බවයි බන්දුල ගුණවර්ධන , ප්‍රසන්න රණතුංග , පවිත්‍රා වන්නිආරච්චි සහ රෝහිත අබේගුණවර්ධන යන හිටපු අමාත්‍යවරුන් සඳහන් කර තිබෙන්නේ. මේ අතර හෙට පත්වීමට නියමිත කැබිනට් අමාත්‍යවරුන් අතරට චමල් රාජපක්ෂ , බැසිල් රාජපක්ෂ සහ නාමල් රාජපක්ෂ යන මහත්වරුන්ගේ නම් ඇතුලත් කර නොමැති බවට වාර්තා වනවා. කෙසේවෙතත් නව කැබිනට් මණ්ඩලයට දැනට රාජ්‍ය අමාත්‍ය ධුරවල ක්‍රියාකරන කංචන විජේසේකර , ඩී වී චානක , කනක හේරත් යන රාජ්‍ය අමාත්‍යවරුන්ගේ නම් ඇතුලත්වීමට ඉඩ ඇති බවයි දේශපාලන ආරංචි මාර්ග පෙන්වාදෙන්නේ.
මේ අතර රටේ පවතින තත්වය හේතුකොටගෙන නව කැබිනට් මණ්ඩලයේ කිසිඳු තනතුරක් ලබා නොගෙනීමට තමා තීරණය කර ඇති බව හිටපු මහජන ආරක්ෂක අමාත්‍ය රියර් අද්මිරාල් සරත් වීරසේකර මහතා ද නිවේදනයක් නිකුත් කරමින් සඳහන් කරනවා.
The post හෙට අලුත් කැබිනට් මණ්ඩලයක් ? appeared first on ITN News.
Post a Comment